احسن حاجة في الموضة الجديدة بتاعة العفش (الاثاث يعني علشان الناس المثقفة اللى معانا) انه من غير صالون.
هي:
living room
اودة نوم
اودة سفرة
مطبخ
و حمام
وطبعا بامكانيات الشباب دلوقتي تبقى:
حصيرة
مرتبة
طبلية
حلة و وابور جاز
و مفيش داعي نقول الاخير حيبقى ايه. شوفوا انتوا بقى؟
المهم انه في جميع الاحوال مافيش صالون.
الحمد الله
...............
يتسأل البعض - ولهم الحق في ذلك و نحن لا ننكر عليهم هذا الحق وانا من موقعي هذا احب ان أوكد على هذا الحق الذي منحته لهم الطبيعة و هو حق مكتسب لهم يكفله لهم القانون والدستور (مملة أنا مش كده؟ ) - عن اسباب كراهيتي للصالون وحقدي عليه؟
بكره من اللي بيحصل فيه..........
يجي واحد طول بعرض و شياكة مع الست مامتو (تنت
) يتفرج على بنت الناس و بعدين يمشي من غير ما يقول آه و لا لأ
اسم الله عليه ..............
و بعديها بنص ساعة يروح هو و تنت يشوفوا واحدة تانية و تالتة ورابعة و يسبوهم كلهم متعلقين لحد ما الباشا شهريار( مش اللى معانا فى المنتدى) يقرر اي واحدة حيمن عليها بشرف جوازه .
و ليه لأ ما البنات كتير على اقفى من يشيل.
من حقه ينقي براحته بقى.
و لازم البنات يحمدوا ربنا و يبوسوا اديهم وش وظهر هو
"حد لاقي جواز؟".
بذمتكوا دي أخلاق ناس محترمين!!!!!؟؟؟؟؟
و هل دي اخلاق و افكار ناس بتخاف ربنا ؟؟؟؟؟؟؟؟؟؟؟
منتهى الاستهتار بآدمية البنت و كرامتها.
بالضبط زي ما يكون بيشتري (لامؤاخذة) جزمة يجرب كذا مقاس وكذا موديل ويشوف ان هي واحدة مريحاه اكتر و يشتريها و يمكن يمشي و ما يشتريش حاجة خالص.
يمكن في ناس مابتعملش كده بس في ناس كتير جدا جدا جدا و جدا لحد بكره الصبح بتعمل كده.
تعالوا يا اولاد نشوف الامثلة دي مع بعض و بالمناسبة الولاد اللى هحكي عليهم اعرفهم شخصيا :
(1)
واحد محاسب العمر 22 مقتدر و عايز يتجوز و صاحبة مامته بنتها في تالتة هندسة و بنت بجد بجد ممتازة.
اتقدم لها و البنت وافقت (و بالمناسبة مامتها من انصار مبدأ
"هو حد لاقي جواز؟") و حددوا معاد علشان قرأة الفاتحة بعد شهر علشان الامتحانات.
خلال الشهر يشاء السميع العليم انه يقابل واحدة على الشات و يعجب بيها اكتر فطبعا يعمل ايه؟؟؟؟؟؟؟؟
يفرقع التانية طبعا
و ايه يعني كلبة و راحت !!!!!!!!!!!!!!
(2)
واحدة تانية حلوة، وظيفة محترمة، عيلة تشرف إلخ إلخ إلخ ....
اتقدملها واحد وشافها اول مرة و بعدين طلب يشوفها تاني
(اصل ما كنش معاه النظارة في الاول )
و بعدين يشوفها تالت (يارب نخلص!! )
و بعد المرة التالتة (الحمد الله ماكنش في رابعة ) يكلمها في التليفون يقول ايه:
"انتي عاجباني اوي يا ... بس ماما (مش باقول لكم تنت
!) مصممة تجوزني بنت خالتي"
(كأن بنت خالته دي اتولدت امبارح باليل و انه فجأة ادرك ان تنت مامته عايزه تجوزها له. بيتقدم للناس ليه طيب !!!!!!!!!!)
وتلاقي واحد عايز واحدة محجبة و يتقدم لواحدة مش محجبة.
و واحد تاني عايزها ما بتشتغلش و يروح يشوف واحدة بتشتغل.
و واحد يسمي البنات "حتت!!!!!!!!؟؟؟؟؟" و يقول "في حتتين بشوفهم دلوقتي".
ايه داااااا ؟؟؟
ليه ما بيخافوش ربنا و يعرفوا ان كما تُدين تُدان و ان كل حاجة بيعملوها حتترد لهم اما في اخواتهم البنات أو بناتهم؟
اكيد الولاد حيقولوا ايه: "يعني نجوز من الشارع ما احنا لازم ندخل البيت من بابه؟"
ماشي يا سيدي ادخل من الباب بس خلي عندك ضمير و خاف ربنا بجد مش كده و كده
يا جماعة، يا معشر الولاد البنات دول بشر ليهم كرامة و مشاعر ما ينفعش احطهم في فاترينة و اقعد انقى منهم.
و ياريت نعرف ان بجد البنت بتتعشم و خصوصا لما بيحصل قبول من ناحيتها و ان بجد كبريائها بيتحطم او الاوقع بقى انه بينهار لما بتترفض بالطريقة المهينة دي.
صحيح الولد برضه بيتضايق لكن بيتضايق مش بيتحطم و ينهار لان الولد اقوى عاطفيا من البنت.
المشكلة كمان ان في بنات بترحب بأنها تبقى للعرض اسمعوا كده الحكاية الغرييييييييييييبة دي:
في احد المعاهد الدينية المحترمة جدا.
طبعا في هناك بنات بتدرس و كتير منهم مش متجوز.
و المعهد بيدرس للبنات و للولاد لكن اكيد كل واحد مفصول عن التاني.
البنات ( وركزوا معايا بقول البنات هه!) عملوا قائمة باسمأهم و وضعهم الاجتماعي و طلبوا من شيوخ المعهد يدوها للولاد علشان اللي عايز يجوز!!!!!!!!!!
لا تعليق !!!!!!!!!
لأ لأ في تعليق ياااااااااااااا لهوييييييييييييييييييييييييييييييييي
هل اصبحت البنت تختزل الي اسم على قائمة؟
هل نزعنا منها كل صفاتها البشرية (مشاعرها و تفكيرها و كرامتها ... )و بقت شيئ يعرض "للي عايز"؟
ياريت البنات برضه تقدر نفسها شوية.
وتبطل الجملة المسستفزة بتاعة "هو حد لاقي جواز دلوقتي".
ويفهموا ان الجواز مش دبلة وفستان وفرح وزغاريط.
ومش اني ابقى مجوزة ويس علشان مايتقلش عليا عانس. أو اني الحق اجوز اقبل ما اعنس.
(مين اللي اخترع الكلمة دي حد يعرفه؟
)
و ان "ضل راجل و لا ضل حيطة"
الجواز ده مودة و رحمة.
لازم اتجوز حد علشان انا مقتنعة بيه هو بالذات و عايزاه هو بعينه مش عايزه حيطة.
و لازم اسال نفسي اسئلة مهمة جدا:
هل الانسان ده ينفع يكون اب لاولادي؟ يعني ابني لما يكبر انا عايزاه يكون زي الانسان ده؟
هل انا فعلا مقتنعة بالانسان ده و لا ده اعجاب وقتي (مؤقت يعني)؟ يعني هل اقدر اعيش معاه 20 او 30 سنة من عمري؟
انا شخصيا برفض بشدة جواز الصالونات لأن ما عنديش اي استعداد ابدا ان حد يجي يتفرج عليا و يا اعجب يا معجبش.
و تقعد البنت تلبس حلو و تتزوق علشان تعجبه. حركات مبتذلة و cheap بالضبط زي ما تكون بتحضر نفسها لعرض.
انا شايفه ان الجواز نصيب ربنا كاتبه و ربنا حيبعت النصيب ده باي طريقة اكيد مش هيكون فيها اهانة للبنت
اعتقد ان الجواز المناسب جواز المعرفة:
حد قابلته في مناسبة
صاحب/صاحبة حد اعرفه
من العيلة
في الشغل
بحيث اكون عارف كل حاجة عن الانسان/ الانسانة دي و بعدين يحصل التقدم و الجواز
طبعا اكيد ممكن حد يقول ان المعرفة دي مش سهلة كده و مش كل الناس عندها الفرص دي
ما احنا قلنا من الاول: كل شيئ نصيب.
و اخيرا "رفقاً بالقوارير" كما اوصانا رسول الله صلى الله عليه و سلم