تمارين للحصول على قوام متناسق بالصور

عضو ذهبى تاريخ التسجيل : 21/10/2007

تمارين للحصول على قوام متناسق بالصور

أكيد حلم كل بنت هو الحصول على قوام متناسق خالي من أي عيوب ممكن تكون موجودة فيه زي مثلا بروز البطن "الكرش" أو مشكلة الأرداف العريضة أو مشكلة "ترهلات الصدر" وغيرها من المشاكل اللي ممكن إنها تأثر على جمالك

وأكيد بتسألي نفسك وبتقولي يا تري إيه السبب في المشاكل دي كلها

لو فكرتِ بينك وبين نفسك كويس هتلاقي إن السبب الأساسي في ظهور المشاكل دي كلها هو "الكسل والخمول وقلة الحركة" اللي ممكن تكون غصب عنك نتيجة مثلا إن طبيعة عملك بتفرض عليكِ الجلوس لفترات طويلة.. أو إنك مش عندك إمكانيات أو وقت إنك تروحي النادي تعملي تمارين رياضية.

بس إيه رأيك لما تتخلصي من كل المشاكل دي وإنتِ قاعدة في بيتك ومن غير أي مجهود.. كل الحكاية إنك تفضي نفسك كل يوم ولو لمدة نص ساعة ونعمل شوية التمرينات اللي هنقول لك عليها دلوقتي وده لأن زي ما إنتِ عارفة إن ممارسة الرياضة شيء ضروري جدا ومفيد.

بس في البداية
قبل ما نقول لك على التمرينات دي عايزينك تاخدي بالك من شوية الحاجات البسيطة دي:
1- ياريت إنك قبل ما تقومي بممارسة التمارين الرياضية وبعد ما تنتهي من ممارسة الرياضة تعملي تليين لعضلات جسمك.. وده لأن البدء المفاجئ في التمارين الرياضية أو الانتهاء المفاجئ منها ممكن إنه يعرضك لمشاكل زي حدوث شد في عضلات الجسم أو تشنجات أو حدوث الألم خاصة لو كانت التمارين دي شديدة شوية.

2- احرصي على شرب كمية كافية من المية في الأيام اللي هتعملي فيها تمارين علشان تعوضي جسمك عن فقدانه للسوائل.

3- مش محتاجة إني أقول لك إنك ماتجيش على نفسك زيادة عن اللزوم في التمارين الرياضية علشان ماتشعريش بالإرهاق والتعب بعد فترة قصيرة من بدء التمرين وتكرهي اليوم اللي فكرتِ فيه إنك تمارسي رياضة..

وخليكِ دايما فاكرة..
إن الحصول على الوزن المناسب والجسم الرشيق مش هييجي بين يوم وليلة، ده محتاج وقت وصبر وجهد ومحتاج إنك تلغي من قاموس حياتك كلمة مافيش فايدة أو زهقت ولازم تعرفي حاجة مهمة قوي وهي إن الاستمرار في ممارسة التمارين دي هو شرط النجاح في الحصول على القوام المثالي الخالي من أي عيوب.

تعالي بقى نعمل التمارين مع بعض
يلاّ.. واحد اتنين...

تمرين الوقوف على أطراف القدمين

تمارين للحصول على قوام متناسق بالصور Kamar_01

والتمرين ده بيسمى تمرين الوقوف على أطراف القدمين وكل اللي هتعمليه فيه هو إنك تقفي على أطراف قدميك لمدة خمس ثوان مع شد الجسم.. وبعد كده تقفي على رجلك تاني.. وترجعي تكرري الموضوع ده 5 مرات مع مراعاة إن إيدك تكون جانبك وظهرك يكون مفرود.
وعلى فكرة التمرين ده مفيد جدا لأنه بيساعد على شد عضلات الجسم ومنع حدوث ترهلات في الفخدين.

تمرين الأرجـل

تمارين للحصول على قوام متناسق بالصور Kamar_06

اقعدي على كرسي مع مراعاة فرد الظهر بعد كده مدي رجلك اليمنى للأمام ورجعيها تاني إلى وضعها الأساسي..
كرري التمرين 8 مرات لرجلك اليمين و8 لرجلك الشمال والتمرين ده بيفيد في التخلص من مشكلة الكرش وتخسيس منظقة الفخدين والتخلص من ترهلات الفخدين.

تمرين البطن

تمارين للحصول على قوام متناسق بالصور Kamar_05

نامي على الأرض وإيدك جانبك بعد كده اثني رجلك اليمن 8 مرات ورجلك الشمال 8 مرات.. والتمرين ده بيساعد على تقوية عضلات البطن والتخلص من مشكلة ترهلات البطن.

تمرين لشد البطن

تمارين للحصول على قوام متناسق بالصور Kamar_03

وده كمان تمرين تاني لشد البطن والتخلص من ترهلات البطن.. كل اللي عليكِ إنك تنامي على وشك وتحطي إيدك ورا وترفعي رأسك بصدرك عن الأرض لمدة خمس ثوان، وتنزليها تاني.. كرري التمرين ده 5 مرات مع مراعاة إن يكون ظهرك مفرود.. ولو عايزة نتيجة أحسن يبقى ياريت تعملي مع التمرين ده تمرين البطن كمان.

تمرين الأرداف

تمارين للحصول على قوام متناسق بالصور Kamar_04

نامي على بطنك وإيدك جانبك وارفعي رجلك اليمين نص رفعة وبعد كده رجلك الشمال.. كرري التمرين ده 5 مرات لكل رجل.. وعلى فكرة التمرين ده هيساعد على التخلص من مشكلة الأرداف نهائيا.

تمرين لتقوية عضلات الظهر

تمارين للحصول على قوام متناسق بالصور Kamar_02

نامي على ظهرك وإيدك جانبك، وبعد كده قومي بظهرك من على الأرض نص قومة لمدة خمس ثوان، ورجعيه تاني على الأرض.. كرري التمرين ده خمس مرات لأنه بيساعد على تقوية عضلات الظهر.

تمرين الحفاظ على الرشاقة

ولو كنتِ رشيقة وعايزة تحافظي على رشاقتك يبقى مافيش قدامك غير التمرين ده..
الخطوة الأولى

تمارين للحصول على قوام متناسق بالصور Kamar_07

تمارين للحصول على قوام متناسق بالصور Kamar_07

نامي على الأرض وحطي رجلك على الكرة واثني ركبتيك بزاوية 90 درجة... ارفعي كتفيك عن الأرض وحطي كفيك على جانبي ركبتيك.

الخطوة الثانية

تمارين للحصول على قوام متناسق بالصور Kamar_08

افردي رجلك على الآخر وشدي مشطي القدمين وفي نفس الوقت افردي ذراعيك تماماً للخلف وعلقيهما في الهواء.. حافظي على الكتفين معلقين في الهواء لمدة 5 ثوان.
كرري التمرين ده 3 مرات مع العودة إلى وضع الاستعداد ولو ماعندكيش كرة مطاطية زي دي ممكن إنك تستخدمي بدل منها كرسي لأداء التمرين.

دي كانت مجموعة من التمارين الرياضية اللي هتساعدك على الحصول على قوام متناسق

اتمنى ان التمارين دي تفيدكم وخصوصا البنات لانى عارف انه صعب نهم يمارسو الرياضه غير الشباب اللى ممكن يمارسوها فى اى مكان

فى انتظار الرد

عضو فضى علم بلدك : تاريخ التسجيل : 08/10/2007

تسلم يا مجدى على الموضوع الجميل ومجهودك فى المنتدى ومنتظرين منك المزيد والمزيد

الادارة علم بلدك : تاريخ التسجيل : 05/10/2007

موضوع جميل منك يا مجدى يا ريت كل البنات يعملوا كدا علشان جسمهم يبقى سمبتيك كدا

عضو نشيط تاريخ التسجيل : 26/10/2007

ياباشا هايل منك

ايوه كده خلينا فى الرشاقة والحاجات الحلوة دي

عضو فضى تاريخ التسجيل : 07/10/2007

ميرسى